"ઓપિનિયન" અને "ગુજરાતી સાહિત્ય અકાદમી" દ્વારા લૉર્ડ ભિખ્ખુ પારેખના શુભહસ્તે શ્રી રતિલાલ ચંદરયા રચિત www.gujaratilexicon.com નું લોકાર્પણ 9મી જુલાઈ, 2006 ના રોજ યોજવામાં આવ્યું છે. બપોરે 2.15 વાગે દિપ પ્રાગટયથી લઈને સાંજે 16:30 વાગે પ્રીતિભોજન દરમિયાન વિવિધ કાર્યક્રમો રાખવામાં આવ્યા છે.
આ લોકાર્પણ વિશેની વધુ માહિતી મેળવવા માટે સંપર્ક કરો : શ્રી વિપુલભાઈ કલ્યાણી, 4,Rosecroft walk, wembley, middlesex, HA0 2JZ (U.K) Phone : 0044-2089020993
Categories: News
પોરબંદરના વતની અને મુંબઈ નિવાસી, લોકપ્રિય અને જાણીતા સાહિત્યકાર શ્રી ગુલાબદાસ બ્રોકરનું ગઈકાલે તા-10-જૂન-2006 ના રોજ સવારે 10 વાગે પૂણેમાં અવસાન થયું હતું. તેઓ શ્રી 97 વર્ષના હતા. 1973-74માં ગુજરાતી સાહિત્ય પરિષદના પ્રમુખ રહી ચૂકેલા એવા આ બ્રોકર સાહેબને તેમના સાહિત્ય સર્જન બદલ 1968માં કુમાર ચંદ્રક, 1991માં પદ્મશ્રી, 1998માં રણજીતરામ સુવર્ણચંદ્રક અને 2000માં નરસિંહ મહેતા પુરસ્કાર આપવામાં આવ્યો હતો. તેમની ઘણી કૃતિઓનો સ્કુલો અને કૉલેજોના અભ્યાસક્રમમાં સમાવેશ કરવામાં આવ્યો હતો. તેમણે ગુજરાતી ટૂંકી વાર્તા ક્ષેત્રે ન ભૂલાય એવું મહત્વનું યોગદાન આપ્યું છે. તેમની ટૂંકી વાર્તાઓ ખરેખર બેહદ લોકપ્રિય થઈ હતી. ઈશ્વર તેમના આત્માને શાંતિ આપે એવી રીડગુજરાતી તરફથી પ્રાર્થના.
Categories: News
સમગ્ર વિશ્વના ગુજરાતીઓ એક મંચ પર એકઠા થાય અને એકતાની ભાવના કેળવાય એ શુભ આશયથી ‘આયના’ (એસોશીએસન ઓફ ઈન્ડિયન અમેરિકન્સ ઓફ નોર્થ અમેરિકા – AIANA) સંસ્થા દ્વારા એક વર્લ્ડ કૉન્ફરન્સ યોજવાનું નક્કી કરવામાં આવ્યું છે. ઉપલબ્ધ માહિતી મુજબ અમેરિકા અને ભારત ઉપરાંત અન્ય દેશોમાં વસેલા ગુજરાતીઓ આ કૉન્ફરન્સમાં હાજરી આપશે. આ કૉન્ફરન્સ ન્યુજર્સીના એડિસન શહેરમાં ત્રણ દિવસ માટે તારીખ 2 થી 4, સપ્ટેમ્બર,2006 દરમિયાન યોજવામાં આવશે. આ કૉન્ફરન્સ નો હેતુ ગુજરાતે અત્યાર સુધીમાં જે જે પ્રગતિ સાધી છે તેની યુવાપેઢીને જાણ થાય તથા તેઓ રાજકિય, સામાજીક, ધાર્મિક, અને આર્થિક ઉપરાંત મનોરંજન-કલા ક્ષેત્રની કઈ કઈ ગુજરાતી પ્રતિભાઓ આજે પોતાની સેવા અને ફરજ બજાવી રહી છે તેનો પણ તેમને ખ્યાલ આવે.
ઉપલબ્ધ માહિતી અનુસાર ત્રણ દિવસના આ કાર્યક્રમમાં સ્વાસ્થય, ઉદ્યોગ, વ્યાપાર, સાંસ્કૃતિક, રાજકિય, સામાજીક, આધ્યાત્મિક અને મનોરંજન – કલા ઉપરાંત આર્થિક ક્ષેત્રોની ગતિવિધિઓ અંગે ચર્ચા વિચારણા કરવામાં આવશે. આ શુભ પ્રસંગે ગુજરાતના સાંસ્કૃતિક તથા ઔદ્યોગિક ક્ષેત્રના મહાનુભાવો હાજર રહી પ્રસંગની શોભામાં અભિવૃદ્ધિ કરશે. સર્વ શ્રી નરેન્દ્ર મોદી, પ્રમુખ સ્વામી, રમેશ ઓઝા, મોરારી બાપુ, હરિપ્રસાદ સ્વામી, ઈંદિરા બેટીજી ઉપરાંત અન્ય જાણીતી ઘણી પ્રતિભાઓ આ કૉન્ફરન્સમાં હાજરી આપશે. આ કાર્યક્રમ વિશે વધુ માહિતી મેળવવા સુજ્ઞ વાચકો શ્રી સુનીલ નાયકનો 732-438-8018 (અમેરિકા) નંબર પર સંપર્ક સાધી શકે છે અથવા http://www.wgc06.org સાઈટ પર વધુ માહિતી મેળવી શકે છે.
Categories: News
1887માં જેનો પ્રથમ ભાગ અને 1901માં જેનો ચોથો ભાગ પ્રગટ થયો હતો એ ગોવર્ઘનરામ માધવરામ ત્રિપાઠી લિખિત ‘સરસ્વતીચંદ્ર’ ગુજરાતી ભાષાની સૌથી વધુ વખણાયેલી, ચર્ચાયેલી અને વંચાયેલી નવલકથા છે. નડિયાદની ડાહીલક્ષ્મી લાઈબ્રેરી અને પ્રો. હસિત મહેતાના પુરૂષાર્થના પ્રતાપે સમગ્ર નવલકથા ફક્ત પચાસ રૂપિયામાં બે સીડીના સેટમાં ઉપલબ્ધ છે, જેમાં ચાર ભાગની આખી નવલકથા ગો.મા.ત્રિ.ના હસ્તાક્ષરમાં હસ્તપ્રતરૂપે અને છાપેલાં પૃષ્ઠ – એમ બેવડા સ્વરૂપમાં વાંચવા મળશે. (અ.સૌ.ડાહીલક્ષ્મી પુસ્તકાલય, સમડીચકલા, નડિયાદ-387001. ફોન.:091-268-2567271).
Categories: News
ગુજરાતી વાચકો પોતાને ગમતા સાહિત્ય સર્જકનો તેમજ તેમની કૃતિઓનો પરિચય મેળવી શકે એ હેતુથી અમેરિકામાં ટેકસાસ સ્થિત શ્રી સુરેશભાઈ જાનીએ એક સુંદર ગુજરાતી બ્લોગની શરૂઆત કરી છે જેનું નામ છે http://sureshbjani.wordpress.com આ બ્લોગની ખાસ વિશેષતા એ છે કે તેમાં હાસ્યલેખકો, બાળવાર્તાના લેખકો, નિબંધકારો, નાટ્યકારો એમ જુદા-જુદા વિભાગો બનાવવામાં આવ્યા છે અને તે દરેક વિભાગોમાં જે તે સાહિત્યકારોનો ટૂંકો પરિચય મૂકવામાં આવ્યો છે. બ્લોગ હજી પ્રાથમિક તબક્કામાં છે અને નિયમિતપણે અમુક સર્જકોની વિગતો મૂકવામાં આવે છે. જો વાચકમિત્રો પાસે કોઈ સર્જકની વિગત હોય તો તે શ્રી સુરેશભાઈનો આ સરનામે sbjani2004@yahoo.com સંપર્ક કરીને આ બ્લોગને વધારે સુંદર બનાવવા માટે મદદરૂપ થઈ શકે છે.
Categories: News
